"وزارتِ خزانہ میں 11واں این ایف سی اجلاس شروع: وفاق اور صوبوں کے درمیان وسائل کی منصفانہ تقسیم کے لیے اہم پیش رفت"

وزارتِ خزانہ میں 11ویں نیشنل فنانس کمیشن (این ایف سی) کا افتتاحی اجلاس وفاقی وزیر خزانہ و محصولات سینیٹر محمد اورنگزیب کی سربراہی میں شروع ہو گیا، جس میں چاروں صوبوں سمیت کمیشن کے تمام ارکان نے شرکت کی۔

وزارتِ خزانہ میں 11ویں نیشنل فنانس کمیشن (این ایف سی) کا افتتاحی اجلاس وفاقی وزیر خزانہ و محصولات سینیٹر محمد اورنگزیب کی سربراہی میں شروع ہو گیا، جس میں چاروں صوبوں سمیت کمیشن کے تمام ارکان نے شرکت کی۔ اجلاس میں ملک کے وفاقی و صوبائی مالیاتی ڈھانچے، وسائل کی منصفانہ تقسیم، محصولات میں اصلاحات اور پائیدار مالی استحکام جیسے اہم معاملات پر تفصیلی غور کیا گیا۔ حکومتی ذرائع کے مطابق این ایف سی کے اس مرحلے کو انتہائی اہم قرار دیا جا رہا ہے کیونکہ حالیہ معاشی چیلنجز کے تناظر میں مالیاتی پالیسیوں کی ازسرنو تنظیم ناگزیر سمجھی جا رہی ہے۔ اجلاس کے دوران وفاقی وزیر خزانہ نے شرکاء کا خیرمقدم کرتے ہوئے کہا کہ این ایف سی کا بنیادی مقصد ایک مضبوط وفاق کے تحت خودمختار صوبوں کو ایسی مالیاتی فریم ورک کی فراہمی ہے جو شفاف، متوازن اور بہتر نظم و نسق کے مطابق ہو۔ انہوں نے واضح کیا کہ پاکستان کی معاشی بہتری اور صوبائی مالی خودمختاری اسی وقت ممکن ہے جب وسائل کی تقسیم زمینی حقائق اور مستقبل کی ضروریات کے مطابق کی جائے۔ ذرائع کے مطابق اجلاس میں صوبائی نمائندگان نے بھی اپنے اپنے مالی خدشات اور تجاویز پیش کیں جبکہ محصولات کے ڈھانچے میں فوری اصلاحات پر زور دیا گیا۔ توقع ہے کہ آنے والے دنوں میں این ایف سی کے تکنیکی اجلاسوں کا سلسلہ مزید تیز ہو گا جس کے بعد نئی سفارشات مرتب کی جائیں گی۔ حکومتی حلقوں نے امید ظاہر کی ہے کہ 11واں این ایف سی ایوارڈ ملکی معیشت کے استحکام اور وفاق صوبہ تعلقات کو مضبوط بنانے میں کلیدی کردار ادا کرے گا

۔